https://docs.google.com/document/d/1z9mRBolwPb2fl7Sm4zPwM9AdvH9zxHC6PklSjfgUxS4/edit?usp=sharing

Sub la flago de Bolsonarismo - Kontakto 2020.3

La faŝisma viruso.


Tri monatojn post la antaŭa numero ― en kiu mi priskribas malsanan periodon pro tre verŝajna kontaĝo de la koronviruso ― kaj nun plene resaniĝinta (sen morbrestaĵoj, espereble), ni pasis de la tiamaj 300 mil infektitoj al pli ol 450 mil mortintoj tutmonde.
Bedaŭrindaj konsekvencoj de la pandemio, kiu en kelkaj lokoj kiel en Brazilo, plu disvastiĝas helpe de la senrespondeca flanke de la aŭtoritatoj.

Sub la deliroj de la prezidanto Bolsonaro, Brazilo jam iĝis la dua plej trafita lando de la mondo kun 50 mil mortintoj pro KOVIM-19. Krom la pandemio, la brazilanoj devas ankaŭ kontraŭbatali alian pation: Bolsonarismon.

Laŭ la sociologo Jessé Souza, la konstruado de nacia identeco ne multe diferencas de fabeloj por plenkreskuloj. Ni homoj bezonas aparteni al grupoj kiel la familio, en kiu ni sentas nin protektataj. Nacia identeco tiam rolas kiel unuecigilo sed ankaŭ povas havi kromajn efikojn. Laŭ Umberto Eco, la kulto al la tradicio; timo pri renovigo; masklismo; rasismo; konstanta militemo estas karakterizoj de la "eterna faŝismo".



Longe antaŭ la nova kronviruso, la viruso de novfaŝismo ekdisvastiĝis tutmonde. Ĝi
atingis lokojn antaŭe konsideratajn asepsaj por ĝia reproduktiĝo. En Brazilo ― lando kutime
prezentata kiel malferma al ĉies popoloj kaj kulturoj ― montriĝis fekunda grundo por ruze
torditaj ideoj, kiuj utiligas i.a. naciismon kiel metodon. Tia viruso ekloĝadis tie delonge, sed
kaŝe atendis lertan manipuladon por kaperi la gastiganton.

Se por brazilanoj kompreni la nunan politikan situacion estas ege komplika tasko, por
eksterlandanoj la defio estas ankoraŭ pli granda. Feliĉe mia amiko Raoni Sousa akceptis
la defion prezenti eron de la situacio ĉi tie por la esperantista tutmonda komunumo. La
aludoj al naziismo kaj militemo sur la kovriloj tute ne estas troigo, ili simple respegulas la
faktojn. Eĉ la nuna konstanta prifajfado de la koronvirusa pandemio ― kiu en Brazilo trafas
la plej malfavoratan socian tavolon ― oni povas rilatigi al iaspeca eŭgeniko.
Aliaj artikoloj de tiu ĉi numero, kvazaŭ interkonsentite, komplementas la enhavon de
la ĉefartikolo. La Blaga Blogo de Viktoro Solé pritraktas la kredantojn de teorioj ― ne nur
konspiraj, sed ankaŭ paranojaj ― kiel la plateco de la tero aŭ la neefikeco de vakcinoj.
Inter la partianoj de Bolsonarismo estas multnombraj la adeptoj de "konspiranojuloj".
Filino de Ciroj de Saĝad Nezhad prezentas la centjaran bataladon por egaleco kaj libereco
por virinoj en Irano.

Kio okazas al la mondo? La rajto dubi pri "definitivaj veroj" estas aŭtentika, sed ŝajne
nun okazas "revolucio de la malklereco", en kiu oni pridubas ĉiujn aŭtoritatojn, negrave
ĉu leĝaj aŭ sciencaj, kvazaŭ ili ĉiuj estus friponoj. Kiel homo kaj esperantisto, mi defendas
pacon. Dialogo gravas, kaj nia civilizacio jam multon konkeris per homaj rajtoj, scienca
kono, demokratio, justico, egaleco kaj libero. Certe, ankoraŭ malperfektaj, sed ni jam scias
kie ni estus sen ili.


La elŝutado de tiu ĉi numero eblas nur por abonantoj. Se vi ankoraŭ ne estas abonanto, vi povas tuj aboni ĝin per reta abonilo. Por elŝuti retan Kontakto vizutu: uea.org/revuoj/

Agrablan legadon!
Rogener Pavinski
La redaktoro

No comments:

Post a Comment