Veganismo

En via familia kaj amika rondo certe troviĝas unu aŭ pliaj veganoj.
Eble vi mem fariĝis vegano lastatempe. La vivmaniero, kiu provas kiel eble plej eviti ĉiujn formojn de ekspluato kaj krueleco al bestoj por manĝaĵoj, vestoj kaj aliaj uzoj, fariĝas pli kaj pli populara.

 Kiuj estas la kialoj por fariĝi vegano? Ĉu la vegana (pure vegetaĵa) dieto estas bongusta kaj sufiĉa por la korpaj bezonoj? Ĉu temas nur pri modo inter junuloj? Se vi estas vegano, dividu kun ni viajn spertojn! Verku por Kontakto!

Genraj Perspektivoj - Kontakto 2017:2

Por ĉiuj novaj ideoj kaj pensmanieroj ekzistas pioniroj, la avangarduloj, kiuj en la fronto de nova pensmaniero batalas kontraŭ la jam eksmoda kaj ne plu taŭga tradicia sinteno. La ĉefartikoloj en la nuna numero estas, tiukadre, parto de la strebo konsciigi kaj atingi pli larĝan spektron por la homaj rajtoj en nia socio. La perspektivoj pri genro, sinidentigo kaj afekcio malfermiĝas pli kaj pli: tial necesas esti atentaj kaj respekti ĉies premisojn ĉi-rilate.

La nuna numero estis ebla nur per la nemalhavebla helpo kaj kunlaboro de la Egalecen-teamo. Egalecen estas grupo de esperantistoj, kiuj celas informi pri pluraneca feminismo en Esperanto. Do, dankon al la tuta teamo! Mi esperas ke iam baldaŭ ĉi tiaj artikoloj estos parto de la historio, kvazaŭ bazaj lecionoj, kiuj en la futuro ne plu estos bezonataj!

Jonny M - La voĉo de la nova generacio

Saluton legantoj!

Ni inaŭguras la unuan numeron de la jaro 2017 kun tre bona novaĵo. Malferminte ĉi tiun eldonon vi povas tion agnoski ― por la unua fojo en la pli ol 50-jara, nia revuo estas presita plenkolore. Ni esperas ke tia Kontakto estas eĉ pli ĝuebla por vi, kara leganto. Kaj se vi tion ŝatas kaj aprezas nian laboron, ni petas vin diskonigi ĝin inter viaj esperantistaj geamikoj. Tiel vi subtenas nin.